La «Strategia Svizra digitala» fixescha las directivas per la transfurmaziun digitala da la Svizra. Ella è lianta per l'administraziun federala. Per ulteriuras parts participadas sco chantuns, vischnancas, economia, scienza e societad civila serva ella sco orientaziun cun la finamira d'utilisar il meglier pussaivel las schanzas da la midada digitala per tuttas e tuts.
La digitalisaziun definescha oz pli e pli nossa vita. Cun ses sistem politic stabil e cun sia capacitad d'innovaziun cumprovadamain auta ha la Svizra ina fitg buna situaziun da partenza per mantegnair il model da success d'ina Svizra degna da viver, averta e moderna er en il futur digital.
Sut quest aspect fixescha la strategia «Svizra digitala» las directivas per l'agir dal stadi e mussa, nua e co che autoritads, economia, scienza, societad civila e politica ston collavurar, per che nus possian concepir cuminaivlamain quest process da transfurmaziun a favur da nossa instituziun publica.
La partiziun Svizra digitala è responsabla per l'ulteriur svilup e per la realisaziun da la Strategia Svizra digitala.